Mütäs Mati kodu om maa all. Maa all om viil pallu kodusit. Mati naaber om rott Ruudi. Temä kodu om kah urun. Mati ja Ruudi kodu om kõrvu. Ütekõrra tulli üleaidse mant kõva mürä. Mati läits vaateme, mes naabrel ädä om. Es ole kedäki, rott Ruudi olli raadiu osten ja sii mäng kõvaste. Küll olli sii kõva lärm. Mütäs küsse: „Mikeperäst su raadiu nõnda kõvaste röögip, kas ta om aiget saanu?“ Rott Ruudi vastas mütäs Matile uhkelt: „Ei ole raadiul kedägit viga, sii om rokkmuusika ja sedä mängites kõvaste!“ Aga selle irmsa mürä pääle tulli suur kamak mulda uru laest valla ja sadas otse raadiu pääle, mes kohe vakka jäi. Rott Ruudi ja mütäs Mati karassive urust vällä ja rott ütel: „Ää, et eluge vällä saime.“ Mütäs Mati ütel manu: „miul miildip iki linnulaulu kullete, sii om pallu ilusemp.“